ثورة تجارة إلكترونية

كمان سنتين البيع والشراء إجباري على الانتيرنت


إذا كنت بتفكر في فكرة مشروع، لازم تفكر إزاي هتنشأه على الانترنت، وإزاي هتسوقه! إليك بعض النصائح في التسويق الإلكتروني.

البراند الذي يتجاهل السوشيال ميديا.. سيموت.. بكل بساطة!

جيف راجوفين.. مؤسس شركة بودي ميديا

وأنا أقول أن البراندات اللي هتتجاهل الإنترنت خالص، ومش هتبيع عليه.. سواء موقع إلكتروني.. أو سوشيال ميديا.. أو أبليكشين.. هتموت!

زمان كانوا بيسألوك أنت عندك قطعة أرض؟ عندك فيلا أو قصر؟ عندك إيه ممتلكات؟؟

كمان سنتين هيسألوك عندك أبليكيشن؟! عندك متجر إلكتروني؟؟


الحضارات بتتطور. الحضارة الفرعونية واليونانية اختفوا. والعصر العثماني اختفى. وعصر التجارة أوف لاين سيختفي، ويصبح القائد هو عصر التجارة الالكترونية.

لذلك إذا كنت صاحب بيزنس.. لازم تبتدي تاخد دورات في التجارة الإلكترونية. أو دورة في التسويق الإلكتروني. في دورة التجارة الالكترونية لازم يكون عندك خلفية عن التسويق. التسويق الالكتروني أداة من أدوات التسويق.

أحدهم سألني: ما هو سر النجاح يا خيميائي؟ 

سر النجاح هو أن تعرف أين يتجه المستقبل وتذهب إليه قبل الآخرين. وقتها تصبح في المقدمة وهم لازالوا في البدايات!

الخيميائي

بعض النصائح الهامة في التسويق

هكلمك عن أهم النقاط.. يجب الاهتمام بها إذا كنت صاحب متجر.. أو أبليكشن.

من حيث البراند

إذا كنت في البدايات لا بأس بالبيع على قنوات السوشيال ميديا. وبالأخص متجر الفيس بوك. ولكن إذا كنت تود أن تظهر بشكل إحترافي.. وبشكل أكثر مهنية.. وتبني اسم لامع قوي ورفيع المستوى.. عليك بإنشاء موقع إلكتروني.. وتقنن متجرك حتى تستقبل فلوس بيعك (المدفوعات) على حساب بنكي. وفي نفس الوقت لها ميزة أخرى هكلمك عنها في نقطة الدفع. البراند هو صورتك.. صورتك اللي في عقل الناس. هما شايفينك إزاي. فكل ما كنت أنت كبير قصادهم..  كل ما اقتنعوا بيك.. وبالتالي تقدر تفرض السعر اللي أنت عايزه $$$.

لذلك لو كنت أنت مستثمر ومعك رأس مال.. استثمر في إنشاء موقع أو أبليكشن.. وأهتم بالدعاية تكون ذكية وموضحة رسالتها.. عشان الجمهور يحب متجرك، ويشتري من عليه.

الموقع الالكتروني أو الابليكشن بيعزز قرار الشراء لدى العميل، إذ إنه بيثق فيك أكتر وقت يحس إنك براند.. مش مجرد شخص بيلهو على السوشيال ميديا. وشوفنا كتير من فضايح في البيع على السوشيال ميديا. بتخلي أي حد يتجنب الشراء، أو يخاف يتنصب عليه. لذلك لازم يكون اهتمامنا الحفاظ على التجارة الإلكترونية لإنها المستقبل وسوقها ضخم!

#أكتر شيء بركز عليه في محاضراتي أو استشاراتي أو كورس التجارة الالكترونية.. هو البراند. لإنه صميم شغلي. وهو المكسب الكبير في رحلتك كبيزنس مان! واللي هيخليك أصلًا بيزنس مان!!


من حيث التعبئة  والتغليف (packaging)

أكتر شيء بيضايقني هو إني أشوف منتج مهم.. يباع عريان في كيس أبيض أو أسود صغير. وليكن ساعة أو زجاجة برفان!

فين التغليف؟! فين البراند في الموضوع؟؟! إزاي عايزني أشتري منك وأصلًا أنت في البتنجان؟! البيع فن. التغليف فن! لازم تكون عارف مصادر بيع تغليفات. سواء علب، أو كراتين.. وكمان تشد عليهم بالسلوفان المطاط. ممكن يكون منتجك قابل للكسر.. أو معرض لجذب روائح كريهة في الطريق.. لذلك لازم تهتم جامد جدًا بالتغليف. العميل ياخد المنتج يشم ريحة وحشة؟!

أو يلاقيه مكسور؟!

#تجربة شخصية!

اشتريت من سوق.كوم قبل كدا منتج. كان طبق زجاجي للفاكهة. بيتحط في الديكور وشكله جميل وقت يجي ضيف وتقدمله فاكهة فيه. المهم جالي؛ لقيته مكسور!!

كلمت سوق.كوم أكيد وجم أخدوه.. ورجعولي الفلوس.. وهكلمك عن النقطة دي لإنها مهمة ليك كبراند. وعلى فكرة أنا ليا تجارب كتير مع سوق.كوم وكان المنتج كويس.. مافيهوش حاجة.. ولكن دي كانت أول مرة استقبل المنتج مكسور.

لذلك الpackaging من أحد الحاجات المهمة اللي تركز عليها. ويكون اللوجو بتاع متجرك أو شركتك عليه حتى لو كان sticker.


من حيث طريقة الدفع

الانسيابية.. السهولة.. التجربة الممتعة.. الإنجاز!

مش بس لازم يكون الدفع عند الشراء. cash on delivery.. ولكن ممكن يكون الدفع عن طريق الفيزا.. عن طريق pay pal أو fawry.. طرق الدفع كتيرة.. لازم تسيبله سماحية في الاختيار. لازم توفرله دا. سواء كان في نفس محافظتك أو في محافظة أخرى!


من حيث الاسترجاع

ليها مرحلتين..

أنا أفضل إن العميل يعمل check على المنتج قدام مندوب الشحن والتحصيل.. ويطمن عليه إنه في حالة جيدة.. لو مش في حالة جيدة أو رفض استلام الاوردر.. المندوب بقى بابستامة حلوة كدا يقوله::

لأ.. أنا مش هستلم الأوردر

تمام يا فندم.. نهارك سعيد.. (في حالة المنتج مش في حالة جيدة) آسفين على الخطأ دا.. وحابين نعوضك عنها بهدية.

لازم حتة هدية دي. Voucher مثلًا على بعض المنتجات. ولو المندوب مقالش.. قسم خدمة العملاء يقول.. حابين نعوضك عن الخطأ دا بهدية.. خصم مثلا على منتج معين.

دي أهم النصائح اللي مكتوبة في كتاب Hug your Haters.. ل Jay bear.. وهو كاتب وصاحب شركة تسويق في الولايات المتحدة ولكنها خاصة بخدمة العملاء. لازم تهتم جامد جدًا بالموضوع دا.. لإنك بتكسب العميل ومش بتضيعه. مش من إخفاق واحد يروح منك. لأ حافظ عليه.

تكلفة العميل الجديد اغلى من تكلفة الحفاظ على عميل قديم!

د/فيليب كوتلر.. الأب الروحي للتسويق

سعداء بتجربتك معانا ونتمنى تتكرر.. نهارك سعيد ( لو العميل رفض استلام المنتج بدون سبب)

حتى لو مكانش في سبب.. هو حر.. البيع مش بالعافية.. خليك متسامح في القضية دي. ومش بالعافية تعرف هو رفض ليه.. هو السؤال مرة واحدة ويكون خاص بيك.. يعني هل السبب مننا ؟؟

لو قال لأ.. يبقى خلاص!


من حيث الشحن

مش هرغي كتير. كل ما سهلت على العميل كل ما كان أحسن. وأسهل وسيلة بالنسباله هي الشحن لحد باب البيت. مش محطة مترو بقى والكلام دا. وكمان دا يبينك براند أكتر! ويفضل في بداية المشروع إنك تعمل شحن مجاني **لفترة محدودة**


دي كدا أكثر النصائح الذهبية في الموضوع دا. وهيكون في أكتر بإذن الله على قناة اليوتيوب بتاعتي.. وعلى بقية منصات التواصل. سارع بإنك تكون من الناس اللي هتبني متجر أون لاين. إحنا متأخرين أوي والعالم سابقنا.. أنطلق.. أجري.. نط.. أقع ومش مهم هتقف تاني.. أتزحلق هههه.. المهم هتنجح لإن دا المستقبل.. وخلي عندك قوة مثابرة!

#الخيميائي.. اضغط على اللينكات دي وتابع كل جديد في التسويق وتواصل معي بابي مفتوح دائمًا.

لينك ملخص كتاب البقرة البنفسجية:

Drive


فيديو اعلانات فيسبوك: https://www.youtube.com/watch?v=ZGjJ3eVv0gE&t=265s

مع تحيات الخيميائي..      

For Business inqures: thealchemisteg@gmail.com

Or contact me on Social Platforms.. Or Whatsapp.:01141534216

Don’t hesitate to contact me