YouTube
قنوات تنفع للمبتدئين والمتقدمين
ما في شيء ساعدني قد اليوتيوب(فان من الدرجة الاولى) يمكن لاني بصرية في التعلم عشان كدة افضله اكتر من اي تطبيق تاني…
بعد ما كتبت الموضوع اللي راح قلت لازم اشارك معاكم القنوات اللي اتابعها الان واتعلم منها حالياً غير القنوات اللي مكتشفتها قريب🔎 واكيد حتفيدكم فقلت لازم من تدوينة جديدة بس عن قنوات اليوتيوب المختصة باللغة الصينية، والثقافة الصينية بشكل عام (طبخ، تعليم، برامج يوتيوب تعجبني❤)
كل القنوات التعليمية الا ما تلقوا فيها فيديوهات للمبتدئين فحلو تمشوا معاهم الين يتطور مستواكم ان شاء الله….
قنوات تعليمية
Learn Chinese: قناة خاصة بجامعة بكين فيها شرح لدروس الـHSK تنفع كمراجعة بعد ما تزاكروا كل درس من الكتاب.
HSK Test Preparation: مو بس مركزين عالاختبارات تلقو عندهم تعليم اللهجات ومواضيع متفرقة لكن احيان تتطلب مستوى متقدم في اللغة.
Learn Chinese with Yi Zhao: شرح للمبتدئين والمتقدمين للمفردات والقاعدات في كتب الـHSK.
Radical Mandarin: شرح طريقة استحداث الكركترات الصينية عن طريق الرسم. يعطي صورة بسيطة ولو انهم بطلوا ينزلوا🙄
ChineseForUs: عرضهم للمعلومة مبسط جدا وواضح تنفع للمبتدئين في اللغة.
ElementaryChinese: يركز على نطق البين يين، حلو لو تشتركوا في حسابه في الانسنتا عشان تختبروا مدى حفظكم مع الستوريهات اللي ينزلها كل يوم.
Xiao Min: قناة لطيفة ومريحة للاعصاب تشرح بشويش ووضوح تنزل قصة كل اسبوع ووصلت الين مستوىHSK الثالث.
Dongyu Official: فيديوهات تناسب المبتدئين عبارة عن مصطلحات وطريقة استخدامها على شكل محادثات قصيرة.
Nihao Chinese: كل فيديو فيلو طريقة النطق الصحيحة للمصطلحات في كتب الـHSK لكل المستويات فينفع للمبتدئين.
طبعا اغلبها تعتمد كتب HSK لانه اكتر كتاب يساعدكم تحترفوا اللغة ترا
قنوات متفرقة
李子柒: مرة احب دي القناة، عبارة عن تغذية بصرية وراحة نفسية يوميات بنت عايشة في الطبيعة😍…انا لحالي اوصل مشاهداتها للمليون من كتر ما اعيدها.
AvenueX: تعجبني مراجعاتها للدرامات ممكن نختلف في الرأي احياناً بس الاغلب نظرتها وتحليلاتها للدرامات ينفع تاخدوا بيها.
和之梦: برنامج مختلف يجيب غالبا حياة اليابانين في الصين والعكس واحيان حياة الصينيين خارج الصين…مختلف(في ترجمة انجليزية اتوفرت مؤخراً)
甜悦Tinrry: اممم قناة خبز حلويات 🍵 لفترة ما بعد الظهيرة🧐 لهجتها تايوانية لكن تكتب بالصينية المبسطة ومرة فيديوهاتها لطيفة وشغلها مرتب احب اتفرجها بس ما اطبق شيء من اللي بتعمله😁…تنفع لتعلم مصطلحات الطبخ والحلويات😋
自得琴社Zi De Guqin Studio: قناة تعرض الثقافة الصينية من خلال معزوفات بالالات الموسيقية الصينية، احب اشوف الالات الموسيقية القديمة وتستهويني طريقة عزفهم ولبسهم.
WORDPIE: في لهم مقاطع خاصة باللغة الصينية ولغات تانية لكن الحلو عندهم يعلمو الكلمات عن طريق الاغاني(ما تفيد ازا بتركزوا على طريقة النطق…حفظ فقط)
九九高效练字: هادي القناة اتفرج عالادمي وهوا يكتب وتخنقني العبرة انو خطي ولا بالمزح ما وصل للمستوى المطلوب😓, يعلم الطريقة الصحيحة للخط وترا ما ادري اش يقولبس اتفرجوا عليه يمكن تستفيدوا وتسيروا خطاطين!
وبس كدة…كل القنوات باللغة الانجليزية مو فلحنة او شيء بس لاني اول ما بديت اتعلم ما كان في شيء يتأخد بيه باللغة العربية (او انا ما لقيت)…بس ازا عندكم ملاحظات استفسارات شيء انا حاضرة وحدور على قنوات باللغة العربية ان شاء الله واجمعها واحطها في تدوينة مختلفة…..ودمتم بود💜