قبل ما اختبر!

باركولي عديت الإختبار💃 💃 وبكل سعادة الحمدلله…وبأتحضر لاختبار التحدث السنة دي…

بعد ما اختبرت في اشياء اتمنيت اني اعرفها او بالاصح انتبهت لها لاني اتوقع بمعرفتها كنت حاخد 100 في كل اقسام الاختبار

طبيعة الإختبار

  • الاختبار 3 اقسام رئيسية: سماعي 45 سؤال، 40 سؤال قراءة، 15 سؤال كتابة بحكم اني اختبرت المستوى الرابع.

  • في القسم السماعي يكون في وقت قصير بين كل سؤال واللي بعده تختار فيه الاجابة و5 دقايق بعد نهاية كل الاسئلة تضلل اجاباتك في نموذج الاجابات.

 ايش اتمنيت اني أسويه قبل ما اختبر؟

  1. اتمنيت اني عديت على كتب الـ HSK من المستوى الاول للتالت لأنه في اخطاء كانت عندي في الكتابة مو لأني كاتبة غلط! فقط لأنه كان المفروض اكتب بشكل متقدم اكتر يناسب المستوى اللي انا فيه ومنها قاعدة استخدام 的 得 地.

  2. اني في الاختبارات التجريبية اكتب بنفسي ما اعتمد على الكتابة من اللاب لانها تساعد بالتنبؤ بالكلمات من لوحة المفاتيح وهدا الغلط اللي حصل لي في كلمة .

  3. اني من اول ما بديت اجرب الاختبارات التجريبية احدد وقت زي في الاختبار لكل قسم من الاقسام لاني انصدمت لما خلصت الجزء السماعي وقت تضليلي الاجوبة ان وقت التضليل انتهى! وكان المفروض ابدا في القسم اللي بعده وانا لسه توي في نص التضليل.

  4. اني اركز اكتر عالسماع فقط اكتر من السماع وعيني عالترجمه الصينية في البرامج اللي باتابعها لان جزئية السماعي يبغالها اذن ماخدة عالسماع بس مع ان درجتي فيها كانت جدا حلوة


📌الاختبار ابداً ما كان صعب والنتيجة الحمدلله حلوه، كتب الـHSK ممتعة فعلا ولا تحسس بالصعوبة حتى بدون مدرس ممكن بعض القاعدات ما نفهمها من الكتب لكن اليوتيوب ما يقصر شرح القاعدات فيه على قفى من يشيل.

📌الشي الوحيد اللي فعلا يبغاله مدرس هو النطق عشان يحدد لك الحروف اللي ما بتنطقها صح ويعلمك عليها، ممكن الكتابة كمان لأني للآن باعاني معاها، عشاني باكتبها كدة بدون ما اركز على قاعدات كتابتها وأصل الكلمات فيها.

لكن انا عديت وانتوا كمان اكيد وحتسمتعوا بدي اللغة وتقولوا هدى قالت!!


وبس كانت تجربه بطلة وحعيدها تاني باذن الله مع مستوى اعلى، وحمستني جدا اجربها في لغة تانية… وخطتي الآن لـ 2020 اللغة اليابانية بما انه فيها كتير من الصيني…انتوا ايش خطتكم لدي السنة؟ مهما كانت خطتكم شدوا حيلكم جايو!

加油!

اراءكم تسعدني❤

Join