مذكرات الاربعاء

تتكلمي صيني؟

تفتكروا اخوية اللي اتحداني اتعلم صيني؟

كنت معاه مرة في السيارة الظاهر كنا خارجين نتمشى.. الا جات سيرة الصين فقلت له اني باتعلم صيني (وكنت في البدايااات مرة) فقال لي تعرفي صيني يلا ايش شجرة بالصيني😏…

الصراحة ما عرفت وانقهرت اني ليش ما حفظت كلمة شجرة…اهلي كلهم كانوا في السيارة وللاسف ما عرفت اجاوب😪…وقال لي ايوة صح بتتعلمي صيني🙄!!! واتحداني لو اني اتعلمت الصيني خلال سنة يجيب لي اخر جوال سامسونج ينزل😂

كان نهائياً مو مصدق لانه له في اللغات وكان عارف انه اللغة الصينية مهي بالسهولة اني اتعلمها بسررعة وفي فترة قصيرة..

وبعدها سرت ما اجيب له سيرة تعلمي للغة كتير…ما اجيبها الا لأمي واخواتي جبتلهم الصداع😂…مع انهم نهائياً ما كانوا مشجعين(بس مامتي الله يسعدها المشجعة الوحيدة)

فزت في التحدي

بعدها في ٢٠١٦ رحت عالرياض وطبعاً الشركات الصينية في ديك الفترة كانت بتعمل مشاريع في الرياض وعدد الشركات الصينية في الصين كل مالها في ازدياد…ولأني كنت مهتمة اقابل احد صيني واستغل فرصة وجودي في الرياض سرت ادور على عناوين شركات صينية وارسل لهم بالصيني والانجلش…قصة حياتي مع الصيني😅

وفعلاً بعد فترة طوييييلة من ارسال الايميلات وصلني رد من مهندس في وحدة من الشركات واعتذر انو رد عليا متاخر لانه لقى رسالتي في البريد الغير هام وقال لي انه مستعد يقابلني لانه فعلاً يحتاج احد في مجال البرمجة…(اكتر مادة ما احبها😥) وانه موعارف هل رسالتي عشان ادور وظيفة عندهم ولا عشان اقابل احد امارس معاه اللغة!

المهم ما صدقت ابداً ورديت عليهم واعطاني شخص صيني معاه في المكتب وكلمتو وقال لي مكان شركتهم، وحددنا يوم نتقابل فيه…

طبعاً سبحان الله اخوية نفسو سليمان😗اللي اتحداني هوا اللي كان معايا في الرياض وفعلا اخدني للمقابلة…

احلى حاجة كانت في الموضوع مو اني قابلت المهندس ولا المهندس الصيني اللي معاه ولا اني اتكلمت صيني…

احلى حاجة كانت نظرة الفخر في عيون اخوية والتفاجئ في نفس الوقت…السنين ديك كلها من 2010 الى 2016 ما كان مصدق اني باجتهد لكن لما شافني باتكلم مع الاستاذ علي (اللي هوا الصيني) كان مرررة مبسوط طووول الجلسة مع انه ابداً مو فاهم شي من الحوار اللي دار بيننا…

في داك الموقف كنت جدا متوترة وكانت المرة الاولى اللي اكلم فيها شخص وجه لوجه بالصيني وجبت العيد طبعاً لان نطقي ما كان ولا قريب من المستوى بسبب انه ما كان عندي مدرس يعدلي نطقي…بس والله كان شعور جميييل لما في السيارة مدحني اخوية الين ما رجعنا البيت وقال لاهلي واعترف انو ابدا ما كان مصدق اني كنت باتكلم صيني واني ابهرت الاشخاص اللي كانوا في المكتب…واني فزت في التحدي😍🙋‍♀️💪


الشركة كانت توها في بداياتها واعتذرت بالنسبة للبرمجة لاني ما احبها ولا اشوف نفسي اشتغل في مجالها على قد ما غصبت نفسي اتعلمها و ابداً الين دحين ما احس بالندم لأي فرصة رفضتها كانت في البرمجة…

لكن كانت المقابلة ديك دافع كبير اني اكسر حاجز الخوف وانه عادي ترا لو غلطت وانا باتكلم لانها مهي لغتي الام عادي اجيب العيد وعادي لو لقيت اشخاص صينيين اروح واتكلم معاهم.


صح فترة من الفترات حسيت بالندم ليش ما لقيت وظيفة في مجال اللغة الصينية واني ليش جلست  سنين اتعلم لغة محد مهتم بيها…بس اخوية نفسه هوا اللي كان يقول لي لسه للان ما جا وقتها استني واستمري…

وفعلا دحين حسيت بقيمة السنين ديك كلها😁

ما عندي مثل اليوم اختم بيه اليوم…فاتركم على خير ودمتم بود🖤

اراءكم انبسط بيها🖤

Join