اتابع برامج ومسلسلات!
من الاشياء اللي حرصت اعملها في الفترة الاخيرة اني احمس نفسي واشجعها بنفسي من خلال ملاحظة تقدمي في اللغة، ومن افضل الطرق اللي تسعدني هي متابعة البرامج وبعض المسلسلات اللي كنت اتابعها في بدايات تعلمي الصينية… وهدي طريقة فعالة انصحكم بيها كل ما حسيتو بالطفش او حسيتوا انكم واقفين في محلكم…ومين ما تجيه لحظات زي كدة؟
عشان كدة حبيت اخلي التدوينة دي عن البرامج والمسلسلات اللي كنت اتابعها وما افهم منها الا يمكن 10-30% من كامل الموضوع! لكني كنت مستمرة لسبب بسيط انه حاجة معينة فيها شدتني.
中国成语大会مؤتمر التعابير الصينية:
برنامج مسابقات، اول ما تابعته عام 2014 وفعلياً ما كنت عارفه هو عن ايش والغريب اني تابعته حلقه حلقة الين طبعا عالاخير سحبت لاني ما اهتم مين يفوز عادةً.
لكن قبل كم شهر رجعت لقيته تاني ورجعت اتابع الحلقات تاني وفهمت هو فعلياً عن ايش وراجعت معاه بعض الشنغ يو اللي حافظتها.
الحلو في البرنامج الحماس اللي فيه والفرق اللي تتبارى بين بعض والمشاركين كانوا اغلبهم شباب وفاهمين منجد…صراحة كان ممتع تلقوا له فيديوهات عاليوتيوب(اضغطوا عالاسم الصيني) وله تقريبا تلات اجزاء الين 2019 لكن اتغير اسمه وآلية المسابقة اظن.
البرنامج مرة انشهر في وقته حتى تقيمه مرتفع في مواقع المشاهدة الصينية…اتفرجوه يساعدكم في تعويد اذنكم على كتير من المصطلحات ولا تتوقعوا انكم حتفهموا كتير من البداية.
快乐大本营 المخيم السعيد
من اشهر البرامج الصينية على قناة هونان وله تقريبا فوق ال 20 سنة يستضيف ممثلين ومشاهير ويلعبوا العاب واسئلة وكدة…فيله فقرات كتير وتختلف من فترة لفترة، احسه ممتع على حسب الضيوف ويساعد مرة في تعلم اللغة الدارجة(slang) ممكن في بعض الحلقات تكون مترجمة (للممثلين المحبوبين من الجمهور العربي) والاغلب لا لكن اتوقع تلقوا له ترجمة انجلش لبعض الحلقات.
لو ضغطتوا على الاسم بالصيني حيوديكم لوحدة من الحلقات اللي تابعتها وتضحك.
天天向上 day day up
من برامج الحوار المفضلة عندي وبرضه يعرض على قناة هونان، واحلى حلقات اللي تكون عن عادات القوميات او الاكلات المشهورة (لحد يجيب سيرة الخفاش رجاءً!) او عن مهن معينة مختلفة مو العادة تتكلم البرامج عنها زي اللي يوصلوا الاكل او السواقين زي اوبر وكريم، اللي يعزفوا على الات قديمة…. برضه البرنامج يستضيف مشاهير ويتناقشوا مع الضيوف اللي مستضيفينهم عن موضوع الحلقة ممكن يلعبوا العاب خفيفة او يعملوا مسابقات بسيطة ممتع صراحة واحب اتابعه من فترة لفترة خصوصا الاجزاء الاقدم بالمذيعين اللي من اكتر من منطقة داخل الصين وخارجها.
舌尖上的中国 قضمة من الصين
ولو ان البرنامج دا ما ينفع اجيب سيرته خصوصا في الوقت الحالي الا انه فعلا كان يشدني ويعرفني على عاداتهم وثقافاتهم في الحياة العادية قبل ثقافة الاكل، وفعلا يعلمنا قد ايش في ناس تاكل اشياء احنا عندنا مستحيل نعتبرها اكل!! وقد ايش ناس تتعب عشان تجيب الاكل، ومع هدا مو كل اللي بنسع عنه حقيقي، المميز في البرنامج انه وثائقي ويمسك صنف معين مثلا السمك ويبدأ يجيب في الحلقة كل جزء من اجزاء الصين وكيف طريقتهم في صيده وطبخه واكله وايش المناسبات المرتبطة بيه…طبعا تقدروا تتفرجوا الحلقات اللي تهمكم عن اكلة معينة وفعلا البرنامج متنوع واخراجه حلو غير انه يساعدكم في حفظ المصطلحات المتعلقة بالاكل.
له دبلجة انجليزية فقط اكتبوا(a bite of china) لما تبحثوا. عملوا منه اكتر من جزء، وترا مو كل الصينيين ياكلوا اكل عجيب(🦇).
في الرابط حلقة عن الفطر استمتعوا!
نجي للمسلسلات
اكتر شي كنت اتابعه تاريخي لاني افضلها عالحديث، حاليا ارجع اتابع المسلسلات على مواقع تدعم لايف شات واتفرجها بتعليقات الناس اللي كلها حش واكتشاف للاخطاء اللي في المسلسل هههه…تجربة حلوة تنوس.
السكينة في النار 琅琊榜
طبعا جبت سيرة دا المسلسل كذا مرة في اكتر من تدوينة، وكان وما زال المفضل عندي وشفته يمكن فوق الخمس مرات لكن اخر مرة كانت بتعليقات فيكي وانصحكم تتابعوه خصوصا الجزء الاول (انا ما تابعت الجزء التاني الا كم حلقة)
في مسلسل الحق ما تابعته من زمان لكنه قديم من 2012 ما عرفت عنه الا الشهر اللي فات قصته حلوه وغير مع انه حديث للاسف ماله ترجمه لكن مايمنع اشاركم هو بما انه قصته مختلفة والتمثيل يفوز صراحة ويحزن😭بكاني كتير صراحة… فيه بعض الاحداث لها علاقة باحداث عشتها عشان كدة يمكن حزنت كتير المهم اسمه 守望的天空، طبعا استنوا الين يخلص رمضان وتابعوا دي الاشياء لانه حرام يضيع رمضان على فرجة…
بقية المسلسلات هممم والله اني اضحك على نفسي كيف كنت اتابعها وهدا دليل اني عقلت😏 ان شاء الله في تدوينة تانية اقول لكم عنها لاني مرة طولت عليكم…
وكالعادة دمتم بود❤