اللغة الصينية زي باقي اللغات عشان تتعلمها لازم تحبها،خصوصا لو كان في شي في اللغة يحتاج اجتهاد اكتر من اللغات التانية او فيها شي من الصعوبة، لو ماتحب اللغة ماراح تلتزم بتعلمها.

ما انكر في بداية تعلمي ليها كنت اقول كيف حقدر استوعب واحفظ الكلمات ولا اتقن النغمات، ناهيك عن البين يين(حتكلم عنو تحت) ولا كتابة الكلمات…لكن لو مو اني حبيتها واقتنعت انها ممتعة ومميزة ما كنت كملت لليوم اتعلمها واكتشف اشياء جديدة عنها.

غير اني انطرب بسماعها وازعجت اهلي وعرفتهم عليها واحس انو وقعها جميل على اذني….باختصار!! لو ماحبيتها ما كنت استمريت بتعلمها.

تاريخ الصين ممتد لأكثر من 5000 عام، وبالنسبالي نقطة التعرف على التاريخ والأحداث اللي حصلت للبلد وأهل البلد نقطة مهمة جدا؛ لأن كثير يقول الصينيين جلفين متشددين خصوصا الكبار صعب التعامل معاهم!!

لو قرأتو عن التاريخ وايش شافوا بحياتهم حتقدروا تفهموا ليش ساروا كدة وايش الأشياء اللي خلت طريقة تفكيرهم تسير بدي الطريقة.

فزي ما قلت معرفة التاريخ تخلي الواحد متفهم ومنفتح أكتر لطريقة تفكير الناس اللي بيقابلهم.

غير كدة قراءة التاريخ الصيني تعطي نظرة لاسباب تكوين ورسم الكلمات او الـ (characters) بالطريقة اللي بنشوفها اليوم.

في الصين ما يقارب 56 قومية عرقية مختلفة فلكم ان تتخيلو مجموع العادات والثقافات المختلفة.

كتير منها مميز ومثير للاهتمام ومؤثر بشكل أو بآخر في عملية اللغة صراحة،احب اشوف البرامج اللي تجيب الاختلافات والعادات واحس اني اتعلم منها كتير، فأكيد انتو كمان حتستمتعوا وتستفيدوا.

سبق وقلت ان اللغة الصينية تحتاج تركيز أكتر بطبيعة انها لغة صوتية، فتغير النغمة لكلمة معينة يعني كلمة تانية مختلفة احياناً تماماً في المعنى… مثلا في الرد على مكالمة بالصيني نقول (واي، 喂، wei) فلو اختلف النطق شوية حتسير (لأن) بدلا من ألو 😂

اضافة انو في اربعة نغمات صوتيه(ممكن نحسب الخامسة النغمة الطبيعية) كل نغمة تحتاج تدريب، وصراحة احسها زي اللعبة لو اعتبرنا كل كلمة لها اربعة اصوات كل صوت يعني كلمة تانية نكّون حصيلة كلمات بمعاني مختلفة…. ممتع!!

اللغة الصينية ما لها حروف ابجدية، اي كلمة تُمثل بشكل أو (character)، بالتالي عشان نمثل الكركترات للاشخاص اللي ما يعرفوا يقرأوها حنستخدم اللغة اللاتينية لتمثيل الكلمات بما يسمى بالـ(بين يين، pīn yīn) وهيا عبارة عن صوت الكلمة بالصيني مكتوب باللاتيني وحفصّل في هذا الموضوع أكتر .

لكن يهمنا هنا نعرف أن كل كلمة مكونة من حروف ساكنة وحرف (او حرفين) علة وحيكون فوق حرف العلة حركة زي دي الحركات تمثل نغمة صوت الكلمة 👇مثلا كتابة اصوات حرف الـi باستخدام البين يين تكون 

ī í ǐ ì .

خلال تعلم اللغة الصينية الا ما راح تصادفوا شي اسمه (تشنغ يو، 成语) أو cheng yuبمعنى تعبيرات اصطلاحية او idioms وهيا مستخدمة بكثرة في الصينية الكلاسيكية ( كحكم أو امثال) وماتزال تستخدم ليومنا هذا كتعبيرات كتابية أو فعلية في الصينية المحكّية، وزي عندنا في العربية لازم في قصص ورا استحداثها.

فهمها يساعد على فهم الثقافة الصينية اللي تعتبر من أهم اسباب احتراف اللغة.

احتراف استخدامها دليل على الذكاء والتعلم والرقي خصوصا لو استخدمت في مكانها بالشكل الصحيح، وتساعد جدا في زيادة التقدم في تعلم اللغة.

كونها تتكون من مقاطع تحوي معنى تعبيري معين مكون من كركترات بمعاني مختلفة….الكلام عنها يطول فبإذن الله حفردلها موضوع مستقل لاحقاً.

أكتر موضوع متعب في تعلم اللغات هو القواعد اللغوية، لكن لما نجي للغة الصينية أكتر شي يميزها هو سهولة قواعدها لدرجة أن البعض يعتقد أنها ما تحتوي على قواعد.

هدا الكلام مو صحيح لكن يضل أن القواعد اللغوية في اللغة الصينية تعتبر من أبسط قواعد اللغات وتطبيقها واضح في أغلب الأحيان.