شركة لين نود

أهلا وسهلًا.

بالنسبة لتجربتي في التدريب مبنية على هدف مسبق لي، وهو أني ادخل عالم الشركات الصغيرة وأعرف وش قصتهم وكيف شغلهم ومدى الاستفاده منها وغير أني ما أعرف وش ابقى أكون (مطور،محلل،مصمم...الخ) .. فالشركات الصغيرة هي التي بتعطيك مساحة تسوي كل هالأمور وعلى أثرها أنت تعرف وين نقاط قوتك و وين نقاط ضعفك و وش تبي و وش ماتبي.. فالحمدلله أن الله منّ علي بأني ما أعرف امشي إلا وأنا حاط لي هدف، وخطة امشي عليها.. ولا بضيع، فيه ناس ماشاء الله عليه عكسي مايحب الأشياء هذي ويمشي على الله (وتفلح معك) وكل واحد وطريقته في الحياة، ولكن أنا على خطتي هذي توجّهي كان معروف وواضح و ماتعبت نفسي في مطاردة الشركات الكبيرة.. من بداية الاختبارات النهائية وأنا عارف أني بتدرب في  Lean Node لأني شهر قبلها بحثت عن كل الشركات التقنية الصغيرة، ثم فرزت فيها الأفضل حسب بحث في تويتر والرؤساء التنفيذيين فيها وشهرتهم.. فقدمت على Lean Node و أقواس و زد و نعناع.. والحمدلله Lean Node ردوا الأول وتقابلت معهم على طول وحبيتهم وحبوني وقبلوني، ولا عاد رديت على أحد.. دخلت معهم تدريب تعاوني (٦ أشهر) كانت من أفضل الأيام لي، بحلوها ومرّها.. تقريبًا لولا الله ثم هي ماخلتني اروح stc وأنا مرتاح واترك الوزارة وأرفض عرض من علم وتكامل.. ما أقولها لك هياط و شفني أبو العريّف جايني عروض، لا.. التجربة هذه في لين نود خلتني أعرف وش أبغى، واختار المكان أنا بعيدًا عن اسم الشركة، وكنت ابحث عن أفضل مكان يقوّي اللي أنا أبغاه والحمدلله ييسر لي stc مع أن عرضها مقارب من عرض علم ولكن البوزشن مختلف.. عمومًا Lean Node شركة تقدم حلول برمجية للشركات الصغيرة، فريق عظيم جدًا ومتفاهم و فاهم الشغل و وش يبي يسوي ومايبي يسوي وحرفيًا لما تقول فريق متكامل تلقاه عندهم، يجيبونك يقولون لك أنا ما ابي منك إلا تغلط وبس، ويعطونك تجرب كل شيء، في فترة تجربتي كنت Product owner, Front-end Dev, Back-end Dev, UI/UX Des درت تقريبًا على كل شيء، حتى أني صرت مساعد مدير مشروع.. وطبعًا كلها ولله الحمد قابلت فيها مشاكل قبل أني أقابل حسنات.. لأن المشاكل اللي وقعت فيها علمتني، وعرفتني وش الصح رقم واحد، وعرفتني من أنا رقم اثنين.. وفي هذه الفترة كنت واعي بكل شيء اسويه لأن بناءً عليها راح اتخذ قرار مصيري لمستقبلي.. حياتي كلها معتمدة على هالقرار.. فمن التجربة هذه عرفت من أنا وعرفت وش ابي وعرفت وش يصلح لي ومايصلح لي بشكل عام.. وبين فترة وفترة اراسل حقين لين نود واشكرهم لأن اللي قدموه لي شيء عظيم.. لذلك نصيحة اقدمها: ١- الفريق وتكاملة أهم من اسم الشركة. ٢- مديرك من هو؟ . ٣- مصمص حرفيًا مديرك والسينيرز. ٤- خذ تدريب تعاوني لأنه يكسّبك أمور كثيييير تحتاجها وقت العمل. ٥- إذا حصلت لك فرصة تروح لـ: Lean Node, Aqwas, Zid فخذ معهم تدريب تعاوني وبل قل لهم لو تبون أجي مجاني جيت 😂