الشبكات
مقابلة مع تركي الدوسري:
#كيف بدأت وطورت نفسك؟
بداية قد يكون عند الإنسان لخبطه في التخصص اللي يرغب فيه ولعل هذا أمر طبيعي من خلال ما شفته وقريت عنه ، لكن كبداية لي في عالم الشبكات هو اني كنت افضل التفكير المنطقي والحصول على حلول ملموسة ونتائج واضحة ولأن الشبكات تعتبر في كل مشروع بصفة صغيره اول متوسطة او كبيره فحبيت اني اتعمق بهالتخصص اللي كان بكل خطوة أخطوها يعطيك القدرة على تطوير نفسك وتحديات يومية فعشان تبني لك شبكة متميزة تحتاج انك تكون مطلع على كل طبقات ال OSI ومتفهم لجميع المتطلبات من حولك .. ولعل أغلب الناس يعتقدون ان مهمة مهندس الشبكات هي توصيل الاتصال من جهاز إلى جهاز .. ولكن لابد من توضيح ان التواصل ركن اساسي لكن يبقى التواصل الصحيح هو الأهم .. وأقصد بالتوصيل الصحيح اللي يلبي حاجات الأمن والتطبيقات في نفس الوقت ، ومع الأيام راح تقدر تطور نفسك في هذا المجال .. ولابد من انك تخطي في البداية أكيد ولكن مع التعلم خطوة بخطوة راح تلاقي نفسك بعون الله في مكانة مجتمعية جيدة ، بالنسبة لتجربتي الشخصية فبديت أطور نفسي بدورتين ثم بديت ابني شبكة بجهازي وفي بيتي فكنت مهوس بهالمجال مما جعل عندي عزيمة قوية اني اقرا عنه واتعلم أدق التفاصيل والمحاولة بإلحاح ، و بيفيدك كثير الحصول على شهادات في هالمجال مما بذكرها بالنقطة الجاية إن شاء الله.
#نصيحة للي حاب يدخل هالمجال ؟
تخصص الشبكات تخصص ممتع لكن فيه مشكلة ان التجربة هي أساس كل شيء وحساسيته انه دايم يكون مبني على طبقات كثيرة ، فدخولك له يخليك مجبر انك تكون شخص عندك صبر وعزيمة قوية جدا وحب تعلم بشكل يومي ، إذا انت مبدع راح يناسبك التخصص كثير فمثل ما قلت لك بناء قناة الإتصال سهل لكن الإبداع يكمن في البناء الصحيح ، بالتوفيق للجميع واللي حاب يتواصل معاي انا حاضر لإجابة أي تساؤل بخبرتي المتواضعة ولكن إن شاء الله أقدر أفيدك.
#أبرز المصادر والشهادات ؟
كبداية لك يفضل انك تعرف أساسيات الشبكات فإذا كانت عندك ولا فيه دورة أسمها "Network+ from CompTIA IT" ، وبعدها كمرحلة ثانية عندك " CCNA R&S from CISCO" ، وبعدها راح توضح لك مجالات العمل تقدر تكمل على ال "CCNP R&S&T from CISCO" ، او عاد تبدا في مجالاتك التخصصية إما في أمان الشبكات أو في الشبكات الداخلية LAN او الخارجية WAN .
#طريقة التواصل معك؟